好快就2021年啦，小助手特別搵咗韓國網絡命理紅人，玄妙(현묘)大師同大家分享2021年嘅開運顏色，一於同大家一齊由年頭行運到年尾啦！

 

1. 肖鼠

2021係辛丑牛年，而鼠同牛又會呈現出六合關係，因此2021年，肖鼠人嘅整體運勢可以表現得相當強勁，值得期待。吉星方面，主要有''文昌''和''歲合''，能夠持續發揮力量，帶嚟好多好事；而凶星方面，則有''病符''和''陌越''，千萬唔好大意，要提高警覺，以免畀疾病有機可乘。於六合年中，肖鼠人要鼓足幹勁，無論工作定讀書，都可以爭取到更高嘅成就。

幸運色: 白色，銀色，黑色

 

2. 肖牛

2021辛丑牛年，係肖牛人嘅本命年，整體運勢較弱。凶星較多，如''太歲''、''劍鋒''、''黄幡''等，好在有''歲駕''吉星嘅幫助，能夠有稍為緩解嘅效果。肖牛人於值太歲年份中，要認清當前情況積極尋求方案，亦可以順利逢凶化吉。同時，要特別留意處理好人際關係，知己朋友多，往往會係你陷於困境時提供到幫助。

幸運色: 紫色，黃色，紅色

 

3. 肖虎

踏入2021年，肖虎人嘅整體運勢較為平均。對於一向刻苦上進嘅肖虎人，或會覺得今年比較辛勞。''孤辰''會直接影響自身情緒，有時做嘢會覺得提唔起精神，就要提醒自己平衡返心情啦。''紅鸞''帶嚟唔錯嘅桃花運，單身朋友就要好好把握了。吉星''天乙''可以帶嚟唔錯嘅運氣，特別係遇到困難時，就能夠及時拉你出困境外。

幸運色: 紅色，綠色，青色

 

4. 肖兔

2021年肖兔人運勢表現一般，由于凶星較多，''喪門''、''地喪''、''披頭''聯合一齊，要做好全方位的防範工作。肖兔人性格較為柔弱，係2021年，要認清自己目標同方向，就可以不斷攀上更高嘅巔峰。另外肖兔人今年要留意唔好太單純，防人之心不可無，否則好有可能令自己陷入可怕境地。

幸運色: 黑色，紫色，綠色

 

5. 肖龍

進入2021辛丑牛年，肖龍人踏入破太歲嘅年份，''貫索''同''勾神''會令肖龍人較難招架，雖然有''太陰''貴人暗中助力，但2021年運勢都會較為低迷。千萬唔好壓跨自己嘅鬥志同信心，渡過短暫嘅低谷期，下半年會逐漸平穩 ，迎接未來嘅巔峰。另外，呢一年要提高戒備心，慎防小人落井下石。

幸運色: 金色，白色，啡色

 

6. 肖蛇

蛇同牛係三合關係，因此係2021辛丑牛年，肖蛇人運勢相當之好。無論事業、財運、感情、健康，都能夠朝住好嘅方向進發。''華蓋''吉星全年環繞左右，默默釋放能量；''正財''吉星可以令肖蛇人係事業上表現突出，獲取豐厚收入；不過亦要小心''吊客''凶星，可能引發各種疾病，要小心注意身體。2021年將會係極好嘅機會。但都唔好太搏命，應該將健康放在重中之重嘅位置，咁就可以長做長有啦。

幸運色: 紫色，黃色，綠色

 

7. 肖馬

對肖馬人嚟講2021係害太歲年份，無論事業、財運、感情、健康，都會受到影響。''咸池''會有唔好嘅桃花，甚至會影響到正常生活；''小耗''會影響財運；另外''死符''對健康影響較大，要小心留意身體。2021年較為波動。一定要有危機感，謹慎小心，保持健康順利過渡呢一年。

幸運色: 藍色，紫色，綠色

 

8. 肖羊

2021年係肖羊人冲太歲的年份，整體運較為一般，''欄杆''顧名思義有機會會有小阻礙同小麻煩，做嘢只要積極正面小心應對就可以愈做愈順；''大耗''指會有機會係唔適合嘅時間用大錢，要投資買樓就要加倍小心謹慎；“歲破”會影響肖羊人嘅日常生活，一定要係生活中同長輩、家人、朋友好好相處，收歛唔好嘅情緒，維繫良好人際關係，係關鍵時候自自然然就會有貴人出手相助。工作上呢一年唔好過度高調張揚，盡量减小自己存在感，少參與工作上嘅紛爭，多多經營準備好自己，為緊接落嚟嘅機會打好基礎。

幸運色: 紅色，黃色，綠色

 

9. 肖猴

進入2021年對肖猴人運勢有好有壞，按照既定步伐去安排好自己的生活同工作就無問題啦。凶星同吉星可謂旗鼓相當，分别佔據一半，''龍德''同''天喜''聯手，可以帶嚟好多好事，另一方面''暴敗''同''亡神''對財運同健康會有影響。肖猴人呢一年只要加倍留意健康，比以往更加冷靜謹慎處事，自然能夠避凶逢吉，好事接種而嚟。

幸運色: 金色，藍色，白色

 

10. 肖雞

2021肖雞同牛正好係三合關係，因此肖雞人呢一年運勢係值得期待嘅。''祿勛''可以促進事業發展，一直未實行嘅計劃呢一年有望實現，''解神''能夠化解感情困局，不過''沉浮''可能會對財運帶嚟唔穩定，要小心謹慎。全年運勢旺盛，但如果把握唔好，最终亦係竹籃子打水一場空。係2021年要不斷調整自己，同時要留意返人際關係和諧嘅重要性，呢年平日要低調，謹慎行事，唔好樹敵太多，否則就會浪費咗今年嘅機會啦。

幸運色: 黃色，白色，金色

 

11. 肖狗

2021年，係肖狗人刑太歲嘅年份，運勢會比較平淡。''卷舌''凶星會帶嚟糾紛，甚至會惹到是非官司；''寡宿''會直接影響肖狗人情緒變得消沉；''絞煞''會制造比較倒霉嘅情況，生活同工作都要小心注意。肖狗人呢一年只要能夠睇清自身局面，唔好退縮逃避，亦唔好太莽撞，遇到困難時要保持冷靜，積極尋求解決方法，天無絕人之路，美好事情就會緊接而嚟。

幸運色: 黃色，紫色，紅色

 

12. 肖豬

2021年肖豬嘅朋友，整體運勢平穩，但偶爾會遇到啲小波折。''驛馬''會令工作變得動蕩，呢年可能需要經常出差，仲有可能會到外地做生意；''吊客''會影響精神和身體，務必要提高警惕。好在辛丑牛年仲有''太極貴人''同''金輿貴人''，能夠於危急時刻挺身而出，幫助肖豬人渡過難關。肖豬人呢一年，一定要令自己勤快起嚟，無論學習定工作都要更為上心。同時，要謹慎理財，今年就能夠有唔錯嘅收獲。另外，要小心忌口，保護身體健康。

幸運色: 黑色，灰色，藍色 

 

以上資訊只供參考。

韓迷小助手

 

 

Source: Tistory.Yavares