幫妳健康減肥、排便嘅super food - 洋車前子‼️

最近因為家人嘅腸胃問題，認識咗洋車前子（Psyllium Husk）。因為佢價錢平，而且個樣平平無奇，本身對佢冇寄予厚望🤷🏻‍♀️～

但佢效果竟然超乎想像，2日就解決咗排便嘅問題！我真係有眼不識泰山，原來佢係好有益嘅super food嚟🤣 !


洋車前子係咩嚟？

洋車前子（Psyllium Husk）係一種提取自洋車前草種子外殼嘅天然纖維質，主要產自印度，一般市面上見到嘅係經過加工磨碎後，變成粉末狀嘅洋車前子粉。

佢之所以會被稱為「超級食物」，係因為佢含有極高嘅水溶性膳食纖維，能夠吸收大量水分，膨脹好多倍形成好似啫喱咁嘅凝膠狀，對腸道健康非常有好處！


洋車前子嘅功效

洋車前子除咗可以幫妳健康減肥、輕鬆排便，對心血管都有好處㗎！

  • 改善便秘：洋車前子內含豐富嘅水溶性纖維，可以吸收腸道中嘅水份，令便便嘅體積增加同時變得柔軟，從而促進腸道蠕動，幫助排便。
  • 有助減重：由於洋車前子吸水後會膨脹，餐前食用有效令人產生飽足感，減少飢餓感同食慾，有助減少熱量攝取。
  • 穩定血糖：有研究指出洋車前子有助穩定血糖水平，對於需要控制血糖或糖尿病患者嚟講係一種唔錯嘅輔助食品。
  • 降低膽固醇：洋車前子能夠吸附膽固醇，幫助降低壞膽固醇水平，對心血管健康有正面影響。

 

洋車前子點樣食？

食法超簡單，任何時候食都可以，餐前食可以增加飽足感，幫助控制食量；餐後食就可以促進消化同腸道蠕動。

一般建議每日5-10克，最直接係將1茶匙嘅洋車前子粉加入一杯約250毫升嘅清水或溫水度攪勻飲用（切記唔好用熱水，因為會破壞佢嘅纖維成份），亦可以將佢加入果汁、乳酪、麥皮、湯。

我自己就會將佢加落咖啡度飲，飲落會有啲滑滑地嘅啫喱口感～☕️


禁忌與注意事項

  • 飲夠水：食完洋車前子一定要飲大量嘅水，如果水份唔夠，反而可能會造成腹脹、胃痛，甚至腸道阻塞。
  • 避免同藥物一齊食：洋車前子可能會影響或延遲某啲藥物嘅吸收，建議食藥前後2小時內避免食用。
  • 以下人士食用前應先諮詢醫生或專業人士意見：吞嚥困難人士、腸胃疾病患者、 糖尿病患者、低血壓人士、曾患大腸直腸腺瘤人士、準備接受手術人士、懷孕或哺乳婦女、食物過敏人士。